英格蘭社區盾今晚爆發，為本周末英超開鑼預熱，聯賽盟主阿仙奴同英足盃冠軍曼城，喺威爾斯千禧球場交鋒。社區盾屬官方錦標，而且雙方視今場係最後熱身，遲歸隊嘅世盃球星相信都會安排落場。相比之下，「藍月亮」陣容更弗更齊整，新帥馬利斯卡有望用冠軍立威。（Now 621周日晚10時直播）文:工廠仔
阿仙奴上季重奪英超冠軍，但大部分主力都要踢今夏世盃，而且殺到入最後階段，當中8名球員躋身4強，所以迪格蘭賴斯、布卡約沙卡、蘇比文迪等主力遲歸隊，回歸練習咗唔夠一星期，上周中熱身賽對科木都冇份上陣，預計幾位主將今場只會短時間上陣；巴西中場般奴古馬雷斯加盟「兵工廠」冇耐，同樣需要時間適應。
阿仙奴殘缺防線告急
最令人擔心嘅係，威廉沙列巴同祖利安添巴兩位主力守將正在養傷，令殘陣嘅阿仙奴季前熱身頻頻出事，4場熱身賽場場都有失波，更被貝迪斯、多蒙特各轟3球，近3仗只得1和2負，狀態明顯不足。提提大家，近6屆以英超冠軍身份出戰社區盾嘅球隊當中，只曾勝出過1次，「兵工廠」似乎亦難逃宿命。
曼城今季出現大變動，哥迪奧拿離隊，帥位由前助教馬利斯卡接替，可以大大加快融合進程。曼城陣容相對完整，又進行過亞洲之旅催谷狀態，近兩場先後擊敗韓職明星隊同西甲勁旅馬德里體育會，狀態漸入佳境；加上艾寧夏蘭特、艾利洛安達臣、謝利美杜古等主力已投入操練，今仗有機會上陣，入局程度勝過阿仙奴，推介客隊「冠軍」。