今輪英超壓軸尾場，「1哥」阿仙奴主場迎戰般尼。阿仙奴依家目標鮮明，剩番2輪只要贏晒就可封王，加上主場特醒實搏埋佢，對住猶如不設防嘅般尼，可謂不勝無歸，不過主W冇肉食，寧捧3.5球大盤。（Now 621及611周二凌晨3時直播）文:法達斯維
今季英超爭標已經去到衝線階段，依家榜首阿仙奴領先次席曼城2分，佢哋只需要做好自己本分，喺餘下2輪聯賽全勝，就唔使理曼城乜嘢戰績，事隔22年後重奪英超冠軍。無論今仗對已護級失敗嘅般尼，抑或煞科日造訪心繫歐協聯決賽嘅水晶宮，點計實力都差阿仙奴一皮，相信能阻到佢哋嘅敵人只係剩番自己。
傷兵復出攻擊力更勁
事實上，嚟到季尾，阿仙奴部分傷兵陸續康復，以上仗鬥韋斯咸為例一度久攻不下，下半場接連換入夏維斯、馬田奧迪加特、馬度基等傷愈嘅球員，進攻即刻變得更銳利，最終險勝1粒取得重要3分。何況阿仙奴主場特別醒神，今季聯賽18次喺酋長球場出擊，取得14勝2和2負，單計近6次便獲5勝1負，主場威力強勁。
般尼紙紮防線等降班
另邊廂，雖然般尼畀人感覺經常玩死守，但今季踢咗36輪失咗73粒，係聯賽失波最多球隊，單計近4仗就失咗10球，其中3次開4球或以上，直頭係紙紮防線。嚟到季尾，揀波梗係要戰意行先，般尼已經篤定降班，點同矢志爭標嘅兵工廠比呢？當然主W得1.05倍太乏味，既然般尼防守唔掂，轉捧3.5球大盤更上算。